Панакота (panna cotta) e италијански десерт што во буквален превод значи „сварен крем“. Во минатото се правел од густ крем (млечен продукт со висок процент на масленост) кој се варел со коски од риба за да се згусти.
Модерната варијанта на панакота е исто така базирана на млечна компонента (крем) и желатин. Може да се комбинира со свежо овошје, овошни сирупи и џемови, чоколадо, разни кремови и путери од јатки. Овој ладен десерт за чија структура може да се каже дека наликува на пудинг е многу едноставен и лесен за подготовка. Вкупното време што треба да го издвоите за најосновната форма не е повеќе од 5 до 10 минути, а после тоа работата ја превзема фрижидерот.
Панакотата веднаш по подготовката е во течна форма и потребно е да се олади убаво пред да се стврдне и да се послужи. Ваквата специфичност која се должи на желатинот може да се исползува и да се направат креативни порции: да се обединат повеќе вкусови и/или да се изработат необични форми (со закосување на садот во кој се лади течноста). Секако, тоа го пролонгира времето на сервирање, но може да биде интересен предизвик за љубителите на креативниот израз.
Во овој рецепт направена е комбинација на панакота со три овошни вкусови (боровинки, малини и манго) и ванила. Состојките одговараат за 6 порции од по 220 – 240 мл.
ОВОШЕН СЛОЈ
Млечна основа:
- 240 мл полномасно млеко
- 240 мл крем павлака (35% масленост, „whipping cream“)
- 1/2 лажичка екстракт од ванила
- 1 лажица јаворов сируп или мед
- 7гр желатин
- 40мл вода
Овошни сирупи:
- 300 гр овошје (100гр малини, 100гр боровинки, 100гр манго) + дополнително за послужување
- 6 лажици јаворов сируп или мед (3×2лажици) – количината се прилагодува во зависност од киселоста на овошјето
- Вода по потреба
- Прво се подготвува пире од манго – се сече на парчиња и се блендира со 1-2 лажици јаворов сируп или мед и 1 лажица вода. Ако мангото е зрело и благо нема потреба од засладувач.
- Во мало тенџере се ставаат боровинките со 2 лажици јаворов сируп и 1 лажица вода. На тивок оган се меша околу 5 минути со повремено притискање на зрната за да се истисне сокот. Кога ќе се добие густа смеса, се трга од оган и се префрла во сад низ цедалка (ова е опционално, пулпата може и да се задржи, но ќе потоне на дното од панакотата, а смесата ќе биде помалку мазна). Истата постапка се повторува и со малините и пирето од манго. Во мангото не се додава ништо, состојките се веќе изедначени при блендирање, а потребно е повеќе време за да се згусти во однос на другото овошје бидејќи содржи повеќе вода.
- Се подготвува млечната основа. Желатинот се става со водата во сад за да набабри. На среден оган во тенџере се ставаат млекото, павлаката, екстрактот од ванила и засладувачот. Се загрева до 70°C (тоа е отприлика половина минута откако течноста ќе почне да испушта пареа) и се трга од оган. Во загреаната смеса се става набабрениот желатин и се меша со жица за убаво да се раствори.
- Во садовите со овошни сирупи се распоредува подеднакво млечната смеса (приближно по 170мл за секој вкус) и се меша со жица за да се изедначат.
- Во садови по избор (чаша, тегличка, рамекин) се става овошната смеса до половина, а потоа се одлагаат во фрижидер минимум 2 до 3 часа за да се олади и стегне.
СЛОЈ СО ВАНИЛА:
- 240 мл полномасно млеко
- 240 мл крем павлака (35% масленост, „whipping cream“)
- 2 лажички екстракт од ванила
- 40 мл јаворов сируп или мед
- 7гр желатин
- 40 мл вода
- Подготовката е иста како и за млечната основа на овошниот слој. Желатинот се става со водата во сад за да набабри. На среден оган во тенџере се ставаат млекото, павлаката, екстрактот од ванила и засладувачот. Се загрева до 70°C и се трга од оган. Во загреаната смеса се става набабрениот желатин и се меша со жица за убаво да се раствори.
- Во садовите во кои веќе е стврднат овошниот слој се распоредува панакотата со ванила. Претходно можат да се стават и парчиња овошје. Се враќаат да се изладат уште 2 до 3 часа пред да бидат готови за сервирање.
- Готовата панакота се служи со свежо овошје и ливчиња нане или мајчина душичка.
Белешки, трикови и совети:
- Доколку горниот раб на садот во кој се лади панакотата е поширок од неговото дно, тој може да се искористи како калап, па панакотата да се извади и преврти на чинија, да се полие со некаков прелив и така да се послужи. Претходно ѕидовите на садот од внатрешна страна можат да се обложат со некакво масло (добра опција е кокосово масло) и во меѓувреме да се чуваат во фрижидер – тоа ќе овозможи полесно одлепување на панакотата. Кога ќе биде готова, со тенок нож се проаѓа на мал дел покрај самиот ѕид на садот (но не до дното), после што во еден дел парчето ќе се одлепи само.
- Панакотата е одличен избор на десерт за подготовка пред време. Во фрижидер може до стои и до 5 дена, но со напомена дека колку подолго стои, толку текстурата станува погумена заради желатинот, што може да се компензира така што ќе се извади 15-20 минути на собна температура пред да се конзумира.
- Наместо млеко, може да се употреби јогурт, грчки јогурт или кефир, со таа разлика што при загревање се става само крем павлаката, а јогуртот/кефирот се додадава откако с-месата ќе се подизлади. Целта е да не се уништат корисните пробиотски култури.
Уживајте!
