По повод 20 години од постоењето на Агенцијата за филм, започнува серија мастеркласови со врвни меѓународни професионалци, со цел унапредување на знаењето и вештините во помалку застапените, но исклучително важни сегменти на филмската индустрија.
Првиот мастерклас ќе се одржи на 7 мај (четврток), со почеток во 11:00 часот, во Cineplexx.
Гостин-предавач ќе биде Andy Kennedy од Англија — еден од водечките светски професионалци во областа на дизајн и монтажа на звук, добитник и номиниран за престижните Emmy и BAFTA награди.
Kennedy има повеќе од три децении искуство и работено на над 90 филмски и телевизиски проекти. Добитник е на две Emmy награди за монтажа на звук на минисериите Band of Brothers и Generation Kill. Минатата недела беше номиниран и за BAFTA Craft Award за најдобар звук за серијата Lockerbie: A Search for Truth.
Неговиот професионален ангажман вклучува работа на некои од најзначајните светски продукции, меѓу кои се Bohemian Rhapsody, The Crown, Batman Begins, филмовите од франшизата Harry Potter and the Deathly Hallows – Part 2, The Imitation Game и Fantastic Mr. Fox.
Препознатлив по својот пристап кој се темели на автентичност, прецизност и емоционална длабочина на звукот, Kennedy ќе понуди уникатен увид во процесот на создавање звучен идентитет во современата филмска продукција.
Мастеркласот претставува ретка можност за директна средба со врвен светски експерт и е наменет за филмски професионалци, студенти и сите кои сакаат да го продлабочат своето знаење во областа на звучниот дизајн. Настанот ќе се одржи на англиски јазик.
Влезот е бесплатен, но бројот на места е ограничен. Потребна е претходна регистрација на следниот линк:
пријава за мастеркласот
Дополнително, на 8 мај ќе се одржи затворена практична работилница наменета за режисери и професионалци од постпродукција, каде учесниците ќе имаат можност за непосредна работа и размена на искуства со предавачот.
