Македонскиот краток филм „Северен пол“ се квалификува за „Оскар“ со освојувањето Големата награда на 63. издание на фестивалот на документарен и краток филм „Зинеби“ во Билбао, Шпанија. Со оваа награда филмот доби номинација за Европски награди (EFA).
Победниците на овој фестивал кој е од А-категорија по автоматизам се квалификуваат и за учество во трката за Оскар. Номинациите од американската Академија за филмска уметност и наука ќе бидат објавени на 8 февруари 2022, а доделувањето е на 27 март.
Ова е уште еден голем успех на „Северен пол“, филм на Марија Апчевска-Петровска во продукција на „Кино око“. По премиерата во официјалната селекција во Кан, филмот „Северен пол“ учествуваше на повеќе од дваесет интернационални фестивали во светот.
Во интервју за „Портрет“, режисерката кажа дека филмот е интимен портрет на главниот лик Марго, која се обидува да пронајде каде припаѓа, да го најде своето место.
„Мала но универзална приказна за тоа колку се важни различностите, колку е важен непокорот и останувањето свој, која од досегашното искуство, успешно комуницира и допира до многу различни луѓе од целиот свет.“, кажа Апчевска-Петровска.
Главните улоги во филмот ги толкуваат Антонија Белазелкоска и Лука Митев. Директор на фотографија е Владимир Самоиловски, сценограф Кирил Спасески, костимограф Биљана Гргур, дизајн на шминка Горан Игњатовски, монтажер Драган Вон Петровиќ, дизајн на тон Игор Поповски и Бојан Паликуча, кастинг Кирија А. Николоска. Продуцент е Роберт Насков, а копродуценти Милош Љубомировиќ од Сервиа филм и Миодраг Поповиќ од Форгрејд од Србија и Петер Шекереш од Тиволи продукција од Унгарија.
