Како и сите артисти чија работа зависи од близината до нивниот субјект фотографката Александра Лис за време на карантинот почна да работи со нови техники со цел да создаде слично ниво на интимност.
„На почетокот на карантинот бев премногу обземена со настаните во светот и не бев толку инспирирана да создавам, да работам, едноставно не бев фокусирана. По неколку недели, анксиозноста ја канализирав во проект и така започна сè“, вели Александра.
„Проектот е за нас и за нашата врска со телата. Се работи за преземање контрола врз тоа како се гледаме и сакаме себе во општество кое постојано ни кажува како тоа треба да изгледа. На почетокот беше малку чудно бидејќи беше ново искуство за сите и имавме бариера пред нас. Не е ниту лесен процесот, постојано да им велиш на жените да го поместуваат лап топот или телефонот за да се добие потребната фотографија, мораше да има јасна комуникација и разбирање. Но, штом навлеговме во работата повеќето брзо се опуштија и се фокусиравме да создадеме заедно нешто специјално“.
Без овој нов пристап, книгата Me + Mine на Лис немаше никогаш да биде создадена. Отворајќи граници, веб камерата и даде на Александра пристап до модели и музи од секаде низ светот, од Хаваи до Кина. „Беше неверојатно да се запознаат жени од многу различни култури и да се соединат за еден проект. Вообичаено сум привлечена од самоуверени жени, кои се познаваат себеси преку прифаќање и труд да преминат преку своите несигурности. Мислам дека ова бара сопствена сила и тие се трудат да ја споделат таа енергија“, дополнува Александра.
Me + Mine дизајнирана од Ева Назарова содржи портрети на голи жени фотографирани преку Zoom разговори. Во книгата се опфатени 44 жени и една силна порака: „Ова сум јас и ова тело е мое, знаејќи дека еманципирањето доаѓа од нас самите, со силата на заедништвото додека го делиме ова патување“ вели Александра.
„Ова е година на интроспекција, што навистина може да биде тежок процес, но исто така ми овозможи подобро да се запознаам себе и работата што сакам да ја креирам“, завршува Александра.
Извор: i-d.vice.com
