Пита со јаболка е парчето храна кое мириса на есен повеќе од што било друго подготвено во една домашна кујна: топла, сочна, слатка, полна со вкус. Ги има сите параметри по кои една храна станува храна на комфорот (англ. comfort food). Овој рецепт за пита речиси целосно го исфрла рафинираниот шеќер. Комбинира крцкава кора богата со путер, фил од бадемов крем-франџипан (англ. frangipane, итал. frangipani, „роднина“ надобро познатиот марципан) и завршен слој од кришки од јаболка искапени во мешавина од лимон, путер и мед. Времето на подготовка може да биде кратко ако кришките ги наредите едноставно, па дури и само ако ги истурите врз филот. Ако се одлучите за обликување на рози спремете се за малку подолг ангажман, но и за искуство со многу мерак.
Потребни состојки (тавче за тарт, дијаметар 26 цм)
КОРА:
-225гр брашно
-150гр путер ладен од фрижидер
-20гр шеќер во прав (опционално)
-прстофат сол
-3 лажици ладна вода (45мл)
ФИЛ / frangipane:
-110гр путер на собна температура
-80гр мед
-150гр мелени бадеми или бадемово брашно
-1 јајце на собна температура
-1 лажичка екстракт од ванила
-1/4 лажичка сол
ЗАВРШЕН СЛОЈ
-4 големи јаболка исечени на кришки
-100мл сок од цеден лимон или портокал
-60гр путер
-60гр мед
Постапка:
-Се мешаат брашното и солта во сад со жица за подеднакво да се распоредат.
-Путерот се толчи со сукало ставен меѓу два листа хартија за печење се додека не се сплеска како палачинка и се враќа во фрижидер да се стегне;
-Сплесканиот оладен путер се кине како хартија во брашното и се започнува со негово гмечење. Движењето на прстите треба да биде како листање на страници од книга. Притоа, многу е важно рацете да се одржуваат ладни со повремено миење со ладна вода, а и просторот во кој се работи не треба да биде многу топол. Така ќе се избегне активирање на глутенот и тестото ќе биде флексибилно за обликување.
-Кога ќе се добие песочна структура се додаваат 3 лажици мраз ладна вода. Тука се продолжува со тап слаткарски нож или друг сличен прибор и се “сецка” и промешува водата низ смесата. Како што се обработува смесата, така таа станува поизедначена и постепено се оформува во тесто.
-Се обликува топче. Се наросува работната површина со брашно. Се меси кратко со врвот на прстите. Кога ќе стане мазно се остава да отстои во фрижидер обликувано во форма на диск (минимум 2 часа ако се прави истиот ден, односно, до 24часа за нареден ден).
-Откако ќе отстои во фрижидер, се става брашно на работната површина и на сукалото и се сука додека не се постигне дебелина од 2-3 мм и дијаметар (или површина) поголема за 4-5 см од дијаметарот на тавчето во кое ќе се пече.
-Тестото се префрла со помош на сукалото во претходно обложено тавче со путер и се натапкува нежно. Вишокот тесто се отстранува, а работ се обликува во цик-цак форма.
-Се боцка дното со вилушка за да се спречи нараснување на тестото при печењеи се става во фрижидер додека се прави филот;
-Се подготвува франџипан – со миксер се мешаат прво путерот и медот, потоа се додаваат останатите состојки. Кога ќе се добие изедначена смеса се нанесува врз тестото за кора, а тавчето се враќа во фрижидер;
-Лимоновиот сок, путерот и медот се затоплуваат во мало тенџерче (не треба да врие). Во топлата смеса се потопуваат претходно исечените јаболка на тенки кришки додека не омекнат за да можат да се виткаат. Се обликуваат и се редат врз филот. Доколку течноста се олади, повторно се загрева.
-Се пече на 200°C околу 30 минути додека не заруменат краевите од кората
Тестото за кората може да се спреми претходниот ден и да стои во фрижидер до 24 часа или замрзнато подолго време. На таков начин глутенот ќе се релаксира и тестото ќе биде полесно за обликување. Пред да се стави во фрижидер, се обликува во стартна форма според тавчето во кое ќе се пече (кружно или правоаголно) и се витка во пластична кујнска фолија. Јаболката се сечат постепено, не сите одеднаш, за да не оксидираат и потемнат.
Убава и вкусна есен!
