За петтото јубилејно издание на SKOPJE CALLING Festival кое ќе сe одржи оваа сабота, на 12-ти септември на стадионот на АРМ- open air, ќе настапат пионерите и младите сили од домашната музичка сцена.
„Бирајќи внимателно, создадовме оригинална и избалансирана комбинација на креативност, свежина и традиција…, со други зборови, на SKOPJE CALLING 2020, MACEDONIA’S FINEST EDITION, оваа година ги имаме: Foltin, Last Expediton, Funk Shui и Pluto’s Doubts. Pluto’s Doubts се тука да ни ја пренесат новата шармантна скопска авангарда, Funk Shui да ни ја доловат нивната експлозивна енергија на сцена, Last Expedition да ни покажат на што работеле за време на долгогодишната музичка пауза и да нѐ потсетат што значи да се биде ,,добрата стара школа”, а Foltin, со Late Night Cabaret Performance да ни покажат, барем на час и половина, како е да се живее младешки без обѕир, раскошно, блудно и некомерцијално“, велат организаторите Авалон Продукција.
Влезниците се пуштени во продажба по цена од 600 денари и истите можат да се набават на avalon.mk, нивната продажна мрежа, како и во Avalon Music & Ticket store во ГТЦ.
„Се разбира, и овој настан ќе биде реализиран според сите протоколи за заштита од Ковид 19, а носењето заштитни маски ќе биде задолжително за сите. Само дома си е дома!“ велат од Авалон.
