Освежете се овие топли денови со плочките од замрзнат јогурт од @kokarche.
Замрзнат јогурт (или популарно наречен fro-yo) се јавува на комерцијалниот пазар во САД во 1970-тите години и доживува голем успех во раните 1980-ти во период кога паралелно со растот на интересот за здрава храна се бара алтернатива на класичниот сладолед.
Вистината е дека за да се направи добар замрзнат јогурт кој е кремаст и лесно може да се сервира сепак се потребни уште две состојки освен јогурт: шеќер и млечна компонента со повисок процент на масленост. Јогуртот во најголем дел од составот е вода која при замрзнување се претвора во кристали, па затоа е тука шеќерот да го инхибира тој процес. Мастите придонесуваат за побогата, кремаста и мазна текстура.
Покрај тоа што се добива ледено задоволство кое од сладоледот се разликува по киселкастиот вкус, крајниот производ содржи и корисни пробиотски култури, а тоа секогаш е одлична придобивка за дигестивниот систем.
За да се направат овие плочки од јогурт потребни се следните состојки:
- 300 мл грчки јогурт (10% масленост);
- 100 мл крем павлака – whipping cream (35% масленост);
- 5 0гр шеќер во прав;
- 3-4 малини;
- 50 гр ф’стаци;
- 30 гр сушена брусница.
Подготовката е многу едноставна.
Јогуртот, кремот, шеќерот и малините се матат со жица или со миксер за поизедначена текстура. Малините се додаваат повеќе за визуелен ефект и да го обојат јогуртот во пастелно розева боја, па доволни се само неколку. Не треба да се претера за да не се влијае на структурата.
Има два начини на кои добиената смеса може да се искористи:
- Изматените состојки се стават во апарат за сладолед, се процесираат согласно упатствата од производителот (обично околу 30 минути). Добиениот кремаст десерт може да се послужи веднаш во корнет или во чинија со свежо овошје;
или
- Смесата се истура во калап за печење (11см x 21см x 7см) или пластичен сад со слични димензии, обложен со кујнска пластична фолија. Се става во замрзнувач од 20 до 30 минути, се вади и по површината се наросува со исецкани ф’стаци и сушена брусница. Се остава да замрзне убаво (минимум 5 часа, најдобро преку ноќ). Се вади со подигање на фолијата (ако има потреба се одлепува внимателно со нож од ѕидовите на садот) и се сече на парчиња/плочки со голем нож во димензии по желба. За полесно сечење ножот може да се помине со врела вода.
Алтернативни состојки:
- Наместо малини, може да се стави друго овошје за обојување (боровинки, вишни, јагоди,…), а за дополнителна арома да се стави рендана кора од цитруси (портокал, лимон, зелен лимон).
- Ф’стаците можат да се заменат со други јаткасти плодови или семиња (пр. семки од тиква), а наместо сушена брусница да се употреби друг вид на сушено или свежо овошје.
Уживајте! 🙂
