Во време на брзи промени, постојан притисок и неизвесна иднина, Универзитет Скопје, како докажано општествено одговорна институција, храбро застанува зад еден од најважните повици – повикот за менталното здравје на младите.
Новата кампања на Универзитет Скопје, насловена „Гласно за тивките мисли“, претставува проект наменет за сите млади луѓе во нашата држава, на кои им е потребна поддршка – преку убав разговор, лесно разбирливи теми и развивање на чувство на припадност.
Тимот на Универзитет Скопје, составен од м-р Билјана Проеска – координаторка на проектот, д-р Емилија Бошковска – психолог и психотерапевт, и Драгана Спасовска – претставничка на граѓанскиот сектор, ја започна реализацијата на проектот во Скопје, посетувајќи ги сите скопски средни училишта, а од септември активностите ќе продолжат и низ другите градови во Македонија.
Кампањата „Гласно за тивките мисли“ не е само проект – таа е движење, глас за оние кои молчат. Таа е простор за сите кои се плашат да зборуваат, и поддршка за секој млад човек што некогаш се почувствувал сам.
„Нашата цел е повеќе од јасна – тоа е подигнување на свеста за менталното здравје, разбивање на табуата, создавање безбедни простори и понуда на конкретни алатки за справување со емоциите, стресот и предизвиците на денешницата,“ истакна м-р Билјана Проеска.
„Кампањата започна во ЈУГД „Раде Јовчевски – Корчагин“, каде во пријатна и отворена атмосфера разговаравме со учениците за нивните емоции, стравови и желби. Најголемите грижи на матурантите се поврзани со матурата – но ние сме тука да ги охрабриме, да ги слушнеме и да им понудиме алатки за справување. Во периодот што следи ќе бидеме присутни во сите средни училишта во град Скопје, за да изградиме вистинска, жива и човечка комуникација со младите,“ изјави Драгана Спасовска.
Замислата на Универзитет Скопје е едноставна, но моќна. Нивната цел е да се создадат училишта каде разговорот за менталното здравје ќе биде природен дел од секојдневието – каде наставниците ја препознаваат тишината што зборува погласно од зборовите, каде родителите слушаат со срце, а заедниците инвестираат во здрави умови, а не само во ѕидови.
Според очекувањата на Универзитет Скопје, идеалната иднина би вклучувала:
- Тимови за психосоцијална поддршка
- Креативни програми за емоционално изразување
- Денови посветени на менталното здравје
- Млади кои ги инспирираат своите врсници
„Овој проект не е само професионален предизвик – тој е заедничка мисија на целиот наш тим. Веруваме во моќта на вистинскиот разговор, искреното слушање и гласното охрабрување. Она што го правиме не е само образовна иницијатива – тоа е враќање на самодовербата и надежта кај младите.
Универзитет Скопје е единствената институција што со целото срце застана зад оваа идеја и ја претвори во реалност. Напредокот на технологијата има свои нуспојави – намалена социјализација и промена на вредносниот систем кај младите, што често води до нарушување на менталното здравје и потешкотии во разбирањето на себе и другите. Ако сакаме да имаме среќна и продуктивна нација во иднина, треба уште денес да инвестираме во менталното здравје на младите,“ нагласи доц. д-р Емилија Бошковска, доктор на психолошки науки и психотерапевт.
„Гласно за тивките мисли“ е проект кој немаше да постои доколку Универзитет Скопје и ректорот, проф. д-р Аце Миленковски, не ја препознаеја потребата од покренување на ваква иницијатива.
Време е да го слушнеме секое тивко срце – заедно, за посреќни и погласни мисли!
