Во светот на фитнесот на глобално ниво, се појави нов вид на физичка активност балет фит или рекреативен балет, кој претставува комбинација од балетската грациозност, правилно држење на телото, рамнотежа и баланс, елементи на балет и пилатес. Придобивките од применување на оваа активност се големи, мускулите се тонираат и издолжуваат, болките во грбот од неправилно седење и спиење се намалуваат, килограмите се губат и се подобрува расположението.
Поразговаравме со Никита Саботковска, балерина вработена во МОБ која има цел оваа физичка активност да ја промовира кај нас: „Балет фит претставува комбинација на балет, јога, пилатес и многу истегнување. Негово редовно практикување би ја подобрила флексибилноста, координацијата, држењето на телото и неговата елеганција. Не е потребно посебна физичка подготвеност, но по кратко време пракса веднаш ќе се забележи напредок во држењето на телото. Во време на пандемија многу е важно да не ја заборавиме потребата телото да остане активно и здраво, па токму поради тоа организиравме часови во СЦ ,,Борис Трајковски” со запазени мерки и протоколи. Има опција и за онлајн часови, па секој може да си избере соодветна опција и да ја подобри својата психо-физичка состојба“, вели Никита.
