Заедно со Atelje Proekting почнуваме серија текстови за уредување на домот и содржини кои имаат информативен карактер за трендови и стилови, новитети во светот на дизајнот и архитектуратa.
Честопати потребно е освежување на ентериерот на домот за добро да се чувствувате во него. Новиот амбиент ќе внесе „свежина“ и нова енергија во секојдневието на целото семејство. Дефинирајте стил и палета на бои кои сакате да ги употребите во редизајнот на просторот. Преку следниве примери визуелизирајте го новиот дизајн кој сакате да го постигнете во домот.
Нова боја на ѕидовите
Со промената на бојата на ѕидовите најбрзо ќе се промени визуелниот впечаток на ентериерот. За поголеми ѕидни површини се препорачуваат пастелни или неутрални бои. Силните бои може да бидат добар акцент на помали површини. Може да се комбинираат две различни нијанси од иста боја за хармоничен тоналитет.
Претапацирајте ја гарнитурата за седење
Гарнитурата за седење, без разлика дали станува збор за аголна гарнитура или комплет од тросед, двосед и фотелја, се парчиња мебел што зафаќаат голем дел од површината на дневниот простор. Со промената на бојата и материјалот за тапацирање ќе внесете голема промена. За комплетен ефект гарнитурата надополнете ја со нови перничиња со бои и дизајн кој го посакувате.
Растенија и зеленило
Внесувањето зеленило во ентериерот е актуелен тренд, и совршено се вклопува во секое уредување на домот. Растенијата не само што внесуваат свежа енергија дома, туку и го подобруваат квалитетот на воздухот. Одберете едно катче со најповолна ориентација за одгледување растенија и сместете ја вашата мала џунгла. Добро би било сите саксии да се во материјал и бои кои се компатибилни.
Нов теписон во дневна соба или трпезарија
Изберете нов теписон со бои, дезени и текстури кој се надополнува со останатите промени кои ги правите. Во тренд во моментот се геометриски дизајни, винтиџ изглед и природни материјали како волна со рустичен изглед. Без разлика дали сакате доминантни бои или изразени текстури во монохроматски израз, успешно може да ја надополните просторијата.
Фотографии:
Beautiful Free Images & Pictures | Unsplash
3 Million Free Stock Photos & Videos · Pexels
