Борбата против насилството врз жени и семејното насилство е клучен аспект за обезбедување праведно и безбедно општество, во кое секој поединец има право на живот без страв. Оваа борба бара системска промена, која вклучува засилување на законодавството, едукација и поддршка за жртвите, а на долг рок, целта е да се создаде култура на нулта толеранција на насилството, каде што никој нема да биде оставен без помош и заштита.
На наше големо задоволство, со Нејзината Екселенција Анџела Прајс Агелер разговаравме за напорите што се вложуваат во подобрување на заштитата на жртвите и превенцијата на насилството во нашата земја, како и за улогата на САД во поддршката на Република Северна Македонија во оваа област.
Кампањата за превенција и за справување со родово базираното насилство ,,16 дена активизам против насилство врз жени и девојки” е во тек. Каква е важноста на сите иницијативи за јакнење на широката мрежа учесници вклучени во оваа борба?
Тоа е навистина важно прашање и благодарам што го поставивте. Во моментот сме на почетокот на 16 дена активизам против родово базираното насилство. Но, дозволете ми да кажам дека 16 дена не се доволни. Потребно е 365 дена активизам против родово базираното насилство и тоа е нешто на кое ние, во Амбасадата на САД, посветуваме многу внимание, бидејќи е критично важно, како што прават и повеќето од нашите колеги во другите амбасади. Ова е исклучително важно прашање од многу причини, некои од нив очигледни, а други можеби помалку.
Научив дека над 60% од жените во оваа земја веруваат дека родово базираното насилство е многу, многу често во нивните заедници, а најмалку 30% велат дека е широкораспространето. Тоа е застрашувачко, бидејќи семејното насилство е најчестиот пример за родово базирано насилство и обично е насочено кон жени, но не е само против жени. Сакам да нагласам дека да повредите некого не е чин на љубов и не е демонстрација на сила. Тоа е криминал и се надевам дека ова ќе подигне свест низ целата земја и во сите заедници.
Но, предизвикот за нас, а ова е уште една причина зошто активизмот треба да трае 365 дена годишно, е што ова се случува насекаде во светот. Се случува во Соединетите Американски Држави. Се случува во сите социоекономски групи. Не е ограничено само на една етничка заедница или на една социјална класа. Тоа е насекаде. Затоа, ние, во Амбасадата на САД, заедно со нашите колеги, невладините организации и граѓанските организации, треба да направиме сè што можеме за да подигнеме свест и да се бориме против ова. Ова мора да престане.
Како локалните заедници и граѓанските организации во Република Северна Македонија можат да придонесат за прекинување на циклусот на родово базирано насилство?
Тоа е многу важно прашање и ние сме среќни во амбасадата што имаме навистина фантастични партнери, не само со другите амбасади туку и, како што рековте, со граѓанските организации и невладините организации. Тоа вклучува сè – од националната мрежа за борба против насилството врз жените и родово базираното насилство до помали организации низ целата земја.
УСАИД поддржува многу од овие организации и тие се тука да помогнат, особено на жените, но не само на жените туку често и на нивните деца, да се извлечат од ситуации во кои се во опасност и да им понудат нови можности. И еве го клучниот дел: да им се помогне да пронајдат алтернативи за да можат сами да заработуваат, да се грижат за себе и за своите деца. Затоа што, на крајот на краиштата, оваа земја не може да си дозволи да не го искористи потенцијалот на 50% од својата популација. Да се исклучи од равенката одреден дел од работната сила и вредните човечки ресурси, особено затоа што се жртви на насилство, едноставно нема смисла.
Важно е да се напомене дека ова не е само прашање за жените туку и за мажите. Мажите треба да ја препознаат вредноста што жените ја имаат во заедниците, во општествата и во економијата, и да ги подигнат и да ги заштитат од непотребно насилство и ваков вид понижување на одреден дел од општеството.
Колкава и каква е улогата на момчињата и мажите во промовирањето на родовата еднаквост и намалувањето на насилството?
Да, веќе малку зборувавме за ова. Но, знаете, еден од моите омилени феминисти е всушност мојот сопруг, кој не само што е мој партнер туку е и татко на нашата ќерка, која е многу самоуверена и моќна жена. Улогите и примерите што ги имаме во нашите животи се исклучително важни – не само жени кои се силни и способни да се спротивстават на вакви ситуации туку можеби уште поважно или барем еднакво важно е и да имаме мажи во нашите заедници кои ќе кажат: „Ова не е прифатливо“.
Не е прифатливо некој да биде жртва на семејно насилство или друго родово базирано насилство. Треба да направиме сè за да се осигуриме дека луѓето се заштитени, особено жените. Ова е апсолутно витална улога што мажите треба да ја преземат – да станат гласни поддржувачи на родовата еднаквост, да се спротивстават на насилството и да помогнат во создавањето општества каде што ваквите проблеми нема да бидат толерирани.
