Како дел од годишната порака за Нова година, студиото „Гибли“ на новиот официјален Твитер профил сподели оригинална илустрација за коронавирусот со порака за фановите на социјалните медиуми. Илустрацијата е нацртана од Хајао Мијазаки, култниот илустратор на студиото и прикажува вол, бидејќи 2021 е година на волот, како гази врз коронавирусот кој носи и маска.
„Минатата година имавме повеќе шанси од вообичаеното да оствариме дијалог со сите вас преку новиот серијал на Горо Мијазаки – „Ервик и вештерката“, со репризирањето на четири наши филма вклучувајќи го и „Спиритед Авеј“, како и зголемена дигитална дистрибуција на глобално ниво. Во свет во кој изолацијата поради коронавирусот продолжува, се надеваме дека барем малку ќе ве насмееме“, велат од студиото.
Пораката имаше и приватна нота бидејќи месецов илустраторот Мијазаки наполни 80 години и беше нагласено дека уметникот е во добро здравје и секојдневно работи на новиот филм „Како живееш“.
Извор: Dazed&Confused
