На овогодинешната конвенција Comic-con во Сан Диего, деновите посветени на стрипови, филмови и видео игри, како и најголемиот светски косплеј настан, повторно беа објавени трејлери за тоа што ќе гледаме наскоро на големите и малите екрани.
По двегодишна пауза поради пандемијата со Ковид 19, косплеерите, актерите и фановите повторно го наполнија центарот за конвенции во Сан Диего со спектакуларно шоу, а се разбира беа објавени и најавени филмови од „Марвел“ но и други изненадувања.
Black Panther: Wakanda Forever
Долгоочекуванииот трејлер за „Црниот пантер: Ваканда засекогаш“, продолжение на „Црниот Пантер“, првиот филм од стрип што добил номинација за Оскар за најдобар филм, беше објавен на конвенцијата. Тизерот оддава почит на починатиот актер Чедвик Боузмен, кој ја имаше главната улога на кралот Т’чала во првиот филм. По објавувањето, трејлерот стана најгледан од филмовите на „Марвел“ со 172 милиони прегледи во првите 24 часа.
Dungeons and Dragons: Honor Among Thieves
Прв трејлер од „Парамаунт“, за филмската адаптација на друштвената игра „Зандани и змејови“. Со наслов „Зандани и змејови: Чест помеѓу крадците“, во филмот глуми неверојатна актерска екипа, како Крис Пајн, Хју Грант, Мишел Родригез, Софиа Лилис и Реџе-Жан Пејџ.
Black Adam
Вториот трејлер за „Црниот Адам“ беше објавен од Ди-си Комикс и е првата улога на Двејн Џонсон како суперхерој. Филмот е спиноф од Шазам! и е 11 филм од проширениот универзум на Ди-си.
Lord of the Rings: The Rings of Power
Амазон Прајм го објави најновиот трејлер за серијата „Господар на прстените: Прстените на моќта“ чија премиера е на 2 септември. Најскапата серија досега направена со буџет од 465 милиони долари, се одвива илјадници години пред дејството во „Хобит“ и „Господар на прстените“ и ќе ги однесе гледачите во ерата кога се правеле прстените и кралствата добивале моќ, но и пропаѓале.
John Wick 4
Авантурите и необичните искуства продолжуваат за Џон Вик, во новиот филм „Џон Вик: Поглавје 4“. На Киану Ривс му се придружуваат Лоренс Фишбурн, Ланс Редик, Дони Јен, Бил Скарсгард и Хиројуки Санада.
National Treasure: Edge of History
Нова серија на платформата Дизни+ која е базирана на филмската франшиза „Национално богатство“ со Николас Кејџ. Дејството се одвива околу Џес, која бара одговори за нејзиното семејство и влегува во авантура за да ја открие вистината за нејзиното минато.
Извор: Euronews
