Павлова торта е раскошен и деликатен десерт со крцкава кора и мека сунѓереста срцевина која потсетува на мачмелоу. Името го добила по руската балерина Ана Павлова која настапувала ширум светот, а во 1926 година ги посетила Австралија и Нов Зеланд. Оттука натаму деталите во приказната за овој декадентен десерт стануваат магливи и никој не е сосема сигурен дали бил готвач од Австралија или од Нов Зеланд тој кој за првпат специјално ја подготвил тортата за балерината после што станала нејзина омилена слатка закуска. Прашањето за потеклото секогаш предизвикува горлива дебата помеѓу двете земји, но она што останува константа е нејзината неодоливост и привлечност во секој поглед.
Потребни се само неколку состојки, малку вештина и неколку трикови за да се направи успешна Павлова торта. Главна улога во составот имаат белки од јајца и шеќер, а традиционално се сервира со изматен шлаг и свежо сезонско овошје.
Потребни состојки:
- 150 гр белки на собна температура (од 4-5 јајца)
- 250 гр шеќер во прав
- 1 лажичка оцет
- 1 лажица густин (пченкарен скроб)
- 250 мл крем павлака (whipping cream, 35% масленост)
- 1 лажица шеќер во прав
- ½ лажичка екстракт од ванила
- 1 шоља свежо сезонско овошје
- 1 лажица кристал шеќер
- 1 лажица вода
- Листови од нане или мајчина душичка за декорација
Подготовка:
- Рерната се загрева на 150⁰C.
- Белките се матат со миксер на средна брзина додека не се формираат средно цврсти врвови при вадење на маталките.
- Постепено се додава шеќерот во прав, лажица по лажица со пауза од 30-ина секунди помеѓу две додавања. Штом се додаде целиот шеќер, ѕидовите од садот се гребат со шпатула и се продолжува со матење уште 5-6 минути или додека смесата не стане сјајна и цврста.
- Се додава оцетот и густинот и се мати уште 3-4 минути.
- Се обложува тавче за печење со хартија на која претходно се црта кружница со дијаметар од 15см која ќе послужи како репер за обликување на тортата. Смесата се истура врз хартијата и со помош на врвот од слаткарски нож се обликува со движења од дното кон врвот. Средишниот дел благо се вдлабнува со лажица за да се создаде простор во кој ќе се стави филот и овошјето.
- Температурата на рерната се намалува на 130⁰C. Се пече 30 минути на таа температура, а потоа уште 2 до 2 и пол часа на 100⁰C. При печење не треба да се отвора вратата од рерната, а откако ќе се испече, најдобро е да се остави да отстои уште најмалку 4 часа внатре или преку ноќ за постепено да се олади и да се избегне нагло пукање на кората.
- Се подготвува кремот – се матат крем павлаката со 1 лажица шеќер во прав и екстрактот од ванила на средна брзина со миксер додека не се добие конзистенција на шлаг.
- Се подготвува сируп – околу една третина од количината од свежото овошје се загрева во сад на среден оган со 1 лажица шеќер и 1 лажица вода, се меша додека не се добие густа смеса. Се процедува и се остава да се олади.
- Врвот од испечената торта се мачка со кремот, потоа се попрскува со овошниот сируп и се завршува со парчињата свежо овошје.
Неколку работи се важни за да се добие успешен резултат:
- Користете вага при одредување на точните колични (вклучително и за белките).
- Садот во кој се матат белките треба да е беспрекорно чист и без траги од влага.
- Користете свежи јајца кои е многу битно да се на собна температура. Во белките не смее да има траги од жолчки бидејќи тоа ќе ја компромитира смесата.
- Температурата на печење прилагодете ја спрема вашата рерна, можеби ќе треба да ја зголемите или намалите. Печењето на смеси кои во составот имаат белки е процес на пробување и грешки и бара трпение и познавање на ресурсите со кои се располага.
- Влагата не ѝ одговара на оваа торта, затоа е најдобро постепено да се лади и суши во рерна пред да се послужи.
- Појавата на пукнатини е сосема нормална и не ја намалува убавината на десертот, туку напротив, придонесува за нејзината автентичност и совршена несовршеност.
- Филот и овошјето е најдобро да се стават непосредно пред послужување бидејќи со својата тежина и влага можат да го нарушат изгледот и структурата на лушпата.
Добар апетит!
