Чоколадо, храната направена од какао зрна, е можеби најпопуларната состојка кога се десертите во прашање. Го има во секакви комбинации, почнувајќи од вообичаените во колачи, бисквити, разни пудинзи, пијалоци и торти, па се до неочекуваните во разни лебови и пецива (сте пробале ли бурек со чоколаден намаз?).
Неговата совршеност е толку силна во нашата палета на вкусови што е прв избор секогаш кога имаме на ум некакво врвно парче храна за да ни одговори на желбата за слатко.
Оваа чоколадна торта е најчоколадниот десерт кој може да го подготвите. Има идеална густина и леснотија благодарение на изматените белки и не содржи класично брашно туку мелени бадеми (цели или бланширани) што и дава многу интересна димензија на крцкавост. При печење во средишниот дел расте и напукнува, а додека се лади потонува при што се создаваат нови пукнатини. Но не грижете се, така и треба да биде. Тоа значи дека се случила хемија (или магија, ако сте поетски расположени) заради која тортата ќе остане доволно влажна и сунѓереста во центарот, а крцкава по површината.
Потребни состојки (кружно тавче со дијаметар од 22-23см):
- 200 гр темно чоколадно (идеално со минимум 70% какао);
- 200 гр несолен путер;
- 4 јајца (издвоени белки и жолчки);
- 2 лажички рум или екстрат од рум;
- 150 гр шеќер;
- 100 гр мелени бадеми или бадемово брашно;
- Прстофат сол; и
- Какао во прав.
Подготовка:
- Рерната загрејте ја на 180°C и обложете го тавчето со хартија за печење .
- Растопете ги чоколадото и путерот. Тоа може да го направите со bain-marie метода така што чоколадото и путерот ќе ги ставите во сад поставен врз тенџере со вода која врие (водата не смее да го допира садот во кој се чоколадото и путерот) и постојано мешајте додека не се изедначат. Другата опција е да ги растопите во микробранова печка на неколку пати во интервали од по 30 секунди со мешање во меѓувреме.
- Во голем длабок сад ставете ги жолчките и 80 гр шеќер и рачно матете додека не добиете бледа и густа смеса. Додадете ја смесата со растопено чоколадо, румот (или екстрактот), мелените бадеми и солта.
- Со миксер изматете ги белките со останатата количина од шеќерот (70гр) и матете додека не добиете сјајна и цврста пена која не истекува доколку садот се преврти или не се формираат цврсти врвови при вадење на маталките.
- Додавајте ја постепено (идеално на три пати) пенастата смеса од белки во чоколадната смеса така што ќе ја мешате предиплувајќи ја со силиконска шпатула. Бидете нежни и не претерувајте со мешање за да не ја изгубите пенастата структура.
- Истурете ја смесата во подготвеното тавче, израмнете ја горната површина и ставете ја да се пече 30 до 35 минути.
- Испечената торта оставете ја да се олади на собна температура околу 1 час, а потоа ставете ја во фрижидер да отстои барем 4 часа пред да ја послужите.
- Украсете ја со какао во прав така што ќе го наросите користејќи мала цедалка со ситни отвори или сито.
За поинтензивен чоколаден вкус додадете 2-3 лажици какао во прав во смесата пред печење.
Доколку користите тавче кое е со страници кои се отстрануваат, од надвор обложете го со алуминиумска фолија за да избегнете протекување бидејќи смесата е течна.
Држете се до времето на печење и не го надминувајте, може да ја препечете и тортата да стане сува. Готова е тогаш кога прободена чепкалка излегува со залепени влажни трошки.
Оваа торта е повкусна денот после печење и е идеален избор за околности кои бараат планирање со време.
На здравје!
