Младинската продукција „Марви“ го претставува својот нов проект, долгометражниот филм „Другата Страна“ кој ќе се емитува премиерно од 6 март во Cineplexx, a светската премиера ќе биде во Канада.
„Другата страна“ е долгометражен филм на Мартин Чичовски и Оливера Каменаровска, што ни ја раскажува приказната за Бобо и Софи, кои по загубата на своите родители се приморани да се соочат со суровата реалност и да пораснат побрзо од своите врсници. Со помош од најблиските, пробуваат да се справат со реалноста во која што живеат. Нивниот поглед кон светот драстично се менува откако ќе го пронајдат светот за кој секогаш сонувале.
„За разлика од многу наши проекти, овој се издвојува со тоа што е наменет и за помалата публика. Може да се каже дека ‘Другата Страна” е првата македонска семејна фантазија, снимен во време на пандемија, без финансиски средства. Идејата која ја добивме за овој филм (семејна фантазија) потекнува од она со кое секојдневно се соочува секој од нас, за сите оние нешта кои се неправилни, но ние луѓето свесно ги правиме, убивајќи го правилното, рационалното и етичкото, проблем со кој, за жал, веќе подолго време се соочува и целиот свет, незнаејќи која е точната формула за менување и справување на истото, или пронаоѓање на исправниот пат. Па затоа, филмот ги претставува двата различни гледишта преку детската и бурна фантазија која го отсликува правилното од неправилното , реалното од нереалното преку искрената надеж и желба на двата главни протагонисти (Софи и Бобо), кои се справуваат со тешката одлука кои што ќе навлезат во една поразлична авантура која ќе ја одгатне точната формула за пронаоѓањето на вистинскиот свет“, велат од продукцијата „Марви“.
На „Другата страна“ работеа вкупно 15 млади ентузијасти со голема пареа и огромна љубов. Актерската екипа ја сочинуваат Филип Каменаровски,Оливера Каменаровска, Тодор Стојковски, Јелопи Седеу Нишевиќ, Ана Петановска, Марија Клепова и Вања Тројачанец. Филмот е во режија од Мартин Чичовски, како што и сценариото е од Оливера Каменаровска и Мартин Чичовски. Одговорноста за камерата и тонот ја превземаа Марија Додовска и Христо Чолаков.
Музиката од филмот е на Ана Петановска, која што направи аранжман со песната „На Овој Свет“, специјално изведена за филмот.
