Сместен на една од најубавите локации над езерото Козјак, Grizzly Mountain Center прерасна во вистински планински еко-центар — место каде што природата, рекреацијата и заедништвото се спојуваат во едно. До неодамна ова подрачје беше запуштено, со диви депонии и калливи патеки, а денес е претворено во уредена зелена оаза со пешачки зони, парк, детско катче, мини зоолошка едукативна зона, терени за спорт, коњи за јавање и ресторан опкружен со чист воздух и поглед што смирува.
Во сабота, 1 ноември со почеток во 11 часот, центарот го отвора месецот на пошумување со настанот „Grizzly Forestation Day“ под мотото „Да засадиме нови 1000 животи заедно!“ Учесниците ќе можат да подигнат садници пред ресторанот и заедно да учествуваат во акцијата за садење, проследена со музика, дружење и настап во живо на In The Mood Band.
Оваа еко-иницијатива е дел од проектот „Forestation Project 2025“, чија цел е засадување на 10.000 нови садници во околината на Јасен и Козјак — од кои веќе се засадени над 4.000. Воедно, цел месец ноември е прогласен за „Grizzly Forestation Month“, кога секој посетител на центарот ќе добие подарок садник што ќе може лично да го засади на локацијата.
Ваквите проекти го претвораат Grizzly Mountain Center во пример за тоа како изгледа современ планински туризам: одржлив, инклузивен и во хармонија со природата. Во време кога градот е сè позагаден и пренатрупан, вакви зелени засолништа претставуваат вистинско бегство за сите што бараат тишина, свеж воздух и чувство на припадност кон нешто поголемо — кон животната средина што нè повикува да ѝ вратиме дел од она што ни го дава.
