Зачетокот на колекцијата „Црна Лирика“ лежи во интимната врска на нејзиниот дизајнер со неговите детски спомени од руралната средина во која е израснат. Овие спомени во прв план ја доведуваат симфонијата на словенскиот паганизам и поетската инкантација на древното словенско вештерство. Со примената на темни тонови и органски силуети колекцијата стреми да пробуди чувства на интроспекција, со цел да се поврзе набљудувачот и/или носителот со неговите или нејзините древни корени. Ова поврзување со сопствените корени кое зависи од усното народно пренесување на културата, традицијата, и народни слики во лирска форма е исто дел од клучната инспирација за колекцијата „Црна Лирика“.
Во словенската култура се застапени разни форми на вештерство како резултат на цврстите културолошко-пагански корени. Примери за ваквите појави се жените врачарки, бајачки, божиќните традиции, итн. Преку овие форми на ритуал во современиот фолклор, словенските народи остануваат поврзани со нивните пагански корени. Голем дел од застапените пагански ритуали и не се директно поврзани со религијата. Голем дел од жени и мажи оделе кај врачарки правејќи магијски обреди за одредена цел ( љубов, плодност, смрт, среќа, несреќа). Сите овие пракси се пренесуваат генерациски или усно, во форма на лирика, во народните песни, или графички прикази преку везовите на народните носии.
Материјалите во колекцијата „Црна Лирика“ се со светкава и сјајна текстура. Колекцијата е составена од црно-сребрени тонови кои симболизираат мистичност, елегантност, и морбидност. Металот е присутен поради застапеноста во многу древни словенско-пагански ритуали. Српот е додаток присутен како елемент кој е воедно и духовен. Во словенската паганска култура, жените врачарки верувале дека со српот имаат можат да ја покоси душата или клетвата на одредена личност за време на ритуал или баење, како што селаните ја косат жетвата.
„Исто така, присутни се модели кои потсеќаат на магионичар со цел да се образложи дека во словенскиот вештерски свет често биле присутни и мажите. Целта на оваа колекција е да ги вкрсти традиционалните и паганските мотиви. Паганските тенденции остануваат дел од магичниот реализам на современата култура. „Црна Лирика“ како колекција се стреми да ги инспирира набљудувачите да ја прифатат традицијата и паганизмот во нашето секојдневие, наместо да го отфрлаат во корист на западните глобалистички трендови.
Со прифаќањето на сопствените корени, ќе формираме можност да ги смениме општествените норми, со оглед на тоа дека поради овие пракси голем број на луѓе имаат страдано во средниот век. Колекцијата „Црна Лирика“ исто така има за цел да ги потсети луѓето на интимната врската помеѓу човекот, природата и традицијата“, се вели во соопштението за колекцијата.
Дизајнер: Х Младеновски
Фотографија: Горан Поповски
Модели: Мирослава Благојевиќ, Христијан Младеновски
Мејкап: Анастасија Величковиќ
Коса: Даниел Артевски
Асистент: Сара Митковска
