Градоначалничката Ен Хидалго даде зелено светло за проектот од 250 милиони евра за да се трансформира најпознатата француска авенија во градина, иако трансформацијата нема да се случи пред 2024 година, кога Париз ќе биде домаќин на летните Олимписки игри. Планираниот проект ќе ја претвори улицата долга 1.9 километри во „неверојатна“ градина.
Комитетот на Шанз-Елизе бил за ваква трансформација уште од 2018 година.
„Улицата ја изгуби својата автентичност во последниве 30 години. Парижаните ја избегнуваа, а беше погодена од неколку кризи – штрајкови, здравствена и економска криза“, изјавиле од Комитетот поздравувајќи го соопштението од градоначалничката.
„Се вели дека тоа е најубавата улица на светот, но ние што работиме таму не сме сигурни во тоа. Шанз-Елизе има сè повеќе посетители и големите бизниси се натпреваруваат да изнајмат простор, но на французите им е здосадена“, изјавил Жан Ноел Реинхарт, претседателот на Комитетот, во 2019 година.
Планот за трансформацијата вклучува намалување на половина од капацитетот за автомобили, улиците да станат бидат пешачки и зелени простори, како и да се направат тунели од дрва за зголемување на квалитетот на воздухот.
Името на Шанз-Елизе е фрацускиот назив за митскиот грчки рај – „Елисејските полиња“. Андре Ле Нотр градинарот на Луи XIV првично ја дизајнирал долгата патека за прошетки. Улицата го добила своето сегашно име во 1709 година, а при крајот на 18-от век станало популарно шеталиште и место за излети. Денес улицата е позната по скапите кафулиња, луксузни продавници за облека и автомобили. Пред да започне пандемијата од ковид-19, архитектот Филип Чамбарета, нагласил дека од 100.000 пешаци на улицата на дневно ниво, 72 проценти биле туристи, а 22 проценти биле вработени, додавајќи дека на булеварот со осум ленти, за еден час поминуваат околу 3.000 автомобили и станува многу загадено. Чамбарета истакнал дека Шанз-Елизе е спој на сите проблеми на еден поголем град, како загадување и сообраќај, туризам и консумеризам и дека треба да се направи поеколошка, подопадлива и поинклузивна.
Планот исто така вклучува и редизајнирање на плоштадот Конкор што се наоѓа на југоисток од авенијата и тоа пред почетокот на Олимписките игри. Целта е трансформацијата на Шанз-Елизе да биде завршена до 2030 година.
Градоначалничката изјавила дека проектот е еден од поголем план за обновување на градот, кој вклучува и трансформирање на просторот околу Ајфеловата кула во огромен парк во срцето на Париз.
Извор: Guardian; Designboom
