Под покровителство на претседателката Гордана Силјановска Давкова, годинашното издание на Women in Tech Macedonia уште еднаш ја потврди важноста на поддршката на жените и младите во технологијата, креативните индустрии и општествениот развој. На настанот беа доделени признанија во девет категории, а меѓу добитничките се најдоа жени и иницијативи кои преку својата работа создаваат реални промени во општеството, од иновации и технологија, до образование, активизам и дигитална култура.
Особено внимание привлече признанието за младата Кристина Мукаетова, која ја доби наградата за „Дигитална креаторка и активист за јакнење на младите“, односно признанието за најперспективна тинејџерка (Aspiring Teen Award). Оваа награда не претставува само признание за нејзиниот досегашен ангажман, туку и силна порака за важноста на младите луѓе кои своето влијание го користат за позитивни промени во заедницата.
Основана во 2019 година, Women in Tech Macedonia е дел од глобалната мрежа Women in Tech Global, која преку повеќе од 60 ограноци во светот работи на намалување на родовата нееднаквост во технолошката индустрија. Организацијата активно ги поддржува девојките и жените во STEM областите, дигиталните професии и претприемништвото преку едукација, менторство и заеднички иницијативи. Токму затоа годинашните признанија имаат особена тежина, тие не се само награди за индивидуални успеси, туку признание за вредностите што едно современо општество треба да ги негува: инклузивност, знаење, храброст и општествена одговорност.
Во таков контекст, приказната на Кристина Мукаетова природно се издвојува. Иако е млада, таа веќе со години е присутна на јавната сцена. Нејзиниот уметнички пат започнува уште на деветгодишна возраст, а на само 11 години веќе има улоги во 84 епизоди од популарна детска телевизиска серија. На 13 години ја претставува Македонија на Јуниорскиот Евросонг, станувајќи препознатливо лице за својата генерација.
Но, она што ја прави значајна фигура за младите денес не е само нејзината медиумска присутност, туку начинот на кој таа свесно ја користи својата популарност. Со желба да создаде простор за искрени разговори и позитивни примери, на 16 години го започнува серијалот „Низ град со Кики“, talk-show формат кој ги отвора темите што младите навистина ги живеат-од самодоверба и предизвици, до мотивација, креативност и личен развој. Преку емисијата, таа создава платформа во која младите можат да се препознаат, да се почувствуваат охрабрени и да слушнат реални приказни наместо недостижни идеали.
Нејзиниот ангажман продолжува и надвор од медиумскиот простор. Кристина волонтира во Црвен крст на Република Северна Македонија, го поддржува СОС Детско село и учествува во иницијативи поддржани од UNICEF, насочени кон поттикнување емпатија, креативност и инклузивност кај младите. Во последниот период беше дел и од кампања за рушење на стереотипите за машките и женските професии, со порака дека иднината не може да се гради врз ограничувачки предрасуди и однапред зададени улоги.
Во своето обраќање по повод наградата, Кристина истакна дека признанието за неа претставува мотив повеќе да продолжи да твори, да инспирира и да поддржува млади луѓе. Посебно ја нагласи потребата од повеќе емпатија, поддршка и позитивна средина за младите генерации, но и важноста да се учи од туѓите успеси наместо да се создаваат токсични наративи и поделби.
Нејзината порака е важна токму затоа што доаѓа од генерацијата што денес расте во свет на постојани дигитални влијанија, притисоци и очекувања. Генерацијата Z сè повеќе бара автентичност наместо совршен имиџ, реални разговори наместо внимателно конструирани фасади. А токму во тоа лежи и значењето на ваквите млади личности, во способноста да создадат влијание преку искреност, општествена свест и желба за промена.
Приказната на Кристина Мукаетова е доказ дека возраста не е пречка за влијание. Напротив, понекогаш токму младите се оние кои најгласно и најискрено ги отвораат темите што му се потребни на едно општество.
