Во светот на модата, каде што трендовите се менуваат со брзина на светлина, ретко се појавува нешто што ги обединува поп-културата, уметноста и стилот на начин што ги надминува границите на традиционалното. Labubu куклите се токму таков феномен. Инспирирани од K-pop културата и со длабоки корени во современата визуелна уметност, тие не се само дизајнерски фигури – туку симболи на стил, индивидуалност и современа естетика кои ги освоија срцата на модните ентузијасти ширум светот.
Но пред да стане глобален моден иконичен лик, Labubu започна како литературен карактер. Првпат се појави во 2015 година, како дел од детската трилогија The Monsters, создадена од уметникот Kasing Lung. Инспириран од нордиската митологија, Lung замислил свет исполнет со мали магични суштества. Labubu на почетокот била спореден лик – разиграна, помалку неуредна, но секогаш со најдобри намери. Таа постојано се обидувала да им помогне на другите, но резултатите најчесто биле хаотични.
Во 2019 година, откако Kasing Lung потпиша договор со кинескиот гигант Pop Mart, Labubu стана ѕвездата на серијата – и нова икона во светот на дизајнерските фигури. Со својата мала, волнеста форма и остар и симпатично злобна насмевка, Labubu се издвојува од останатите ликови. Според Емили Броу, раководителка на лиценцирање за Pop Mart North America, Labubu е „добронамерна“ и не постои ништо злобно во неа – таа само повремено завршува во неволја обидувајќи се да направи нешто убаво.
K-pop одамна не е само музика – тоа е естетика, култура, животен стил. Labubu ја рефлектира оваа енергија: со својот карактеристичен изглед, изразена личност и фантастично стилизирани детаљи, таа нуди визуелен јазик кој лесно комуницира со публика навикната на брзи, креативни и визуелно привлечни содржини.
Labubu не се ограничува само на инспирација од K-pop; таа активно се вградува во модниот универзум преку соработки со дизајнери и култни имиња од поп и уличната култура. Меѓу највпечатливите е појавата на Labubu кукла облечена во црна дуксерка со логото на Kobe Bryant – што предизвика шпекулации за потенцијална соработка со Vanessa Bryant и официјална capsule колекција што ќе ја спои уличната мода со идолската естетика.
Иако на прв поглед изгледа како дизајнерска играчка, Labubu одамна ги надмина тие рамки. Таа е објект на желба, предмет за колекционерство и моден стейтмент. Одредени изданија се распродаваат за само неколку минути, а цените на официјалната страница на Pop Mart се движат значително повисоко од просечната цена на играчки – со што се доближуваат до ниво на уметнички предмети или модни додатоци.
За секое ново издание се создава вистинска масовна хистерија – редици пред продавници, онлајн листи на чекање и препродажни пазари каде цените експлодираат уште истиот ден. Колекционерите и фановите будно го следат секое ново лансирање, надевајќи се дека ќе добијат барем една од посакуваните фигури пред сè да се распродаде.
Финансискиот успех зад овој бренд е исто толку фасцинантен. Основачот и извршен директор на Pop Mart, Ванг Нинг, благодарение на глобалната популарност на Labubu, во само еден ден го зголеми своето богатство за 1,6 милијарди долари – станувајќи милијардер преку ноќ. Ова е јасен показател дека зад овој наизглед симпатичен карактер стои совршено темпирана стратегија, комбинирана со длабоко разбирање на новите генерации потрошувачи.
Labubu е повеќе од производ – тоа е визуелен идол, симбол на новата ера на модна комуникација. Со способноста да се адаптира на различни културни и стилски контексти, Labubu не само што се вгнездува во светот на колекционерите, туку веќе сериозно се позиционира и на модната сцена.
