Доколку сте во потрага по нешто поразлично од обично излегување и сакате некое ново искуство, оваа листа е за вас. Ви предлагаме неколку уникатни идеи како да се забавувате и да поминете квалитетно време со вашето друштво, другар/ка, партнер/ка, сестра/брат, мајка/татко или со колегите. За среќа, во последно време има сѐ повеќе иницијативи од ваков тип и лесно може да го претворите вашето излегување и дружење во одлична забава и искуство за паметење, а притоа да запознаете и нови интересни луѓе.
Правење на домашна паста, сликање на стакло, декорирање на керамика и свеќи и неограничени пијалаци. Sip&Create е одлично место за креативност, дружење и учење нови работи во пријатна атмосфера. Може да ја одберете вашата омилена работилница од нивниот распоред или да закажете работилница за роденден, моминска, корпоративни настани итн.
Бидете својот омилен бармен. Коктел работилници за одлична забава и можност да откриете тајни за подготовка на коктели од професионалци. Ваше е само да го одберете вашето друштво и термин што ви одговара. Секако, секогаш може да пробате некое искуство и сами или да запознаете нови луѓе и одлично да се забавувате. За време на работилницата ќе подготвите (и испиете) три различни коктели.
Сликарски работилници за луѓе со и без искуство, спремни за забава и креативност. Низ процесот ќе ве води уметник, а ќе ви помага виното. Сите учесници сликаат иста слика, однапред одредена, со тематска музика. На пример ако го цртате Њујорк секако дека ќе го слушате Френк Синатра. Одлична идеја за забава и квалитетно поминато време. Вашето уметничко дело си го земате со себе за спомен, а којзнае, можеби ќе биде мотивација за уште многу други.
Научете да готвите македонски традиционални јадења на модерен начин, француска, италијанска, тајландска, либанска кујна, да правите домашни пити, слатки, колачи и со кое кафе да ги послужите и уште многу други кулинарски техники. Освен тоа може да научите како да одгледувате микробилки во вашиот дом, да научите повеќе за типовите и начинот на одржување на јапонските ножеви и многу повеќе. Погледнете го нивниот распоред на настани и изберете ново искуство.
