Италијанската дигитална уметница Кјара Санторо ги претвора секојдневните фрагменти од животот во визуелни светови каде што реалноста и имагинацијата без напор се судираат и спојуваат. Нејзините најнови дела ја носат публиката во свет на соништа, каде архитектурата, ретро-портретите и природните текстури добиваат нови и неочекувани улоги.
Секоја композиција изгледа како приказна раскажана без зборови – исполнета со симболика, со игра на спротивставени елементи и изненадувачки комбинации. Тоа е уметност што истовремено е разиграна и магична, но и чудесно блиска до стварноста.
Санторо е родена во Торино во 1989 година, а уште од 2013 ја развива својата неконвенционална креативна метода. Работи исклучиво дигитално, користејќи таблет и секојдневни фотографии што ги трансформира во фантастични визуелни слики. Женските фигури често се во центарот на нејзините дела – поставени во амбиенти каде познатото и непознатото, старото и новото, реалното и фантастичното се претопуваат во единствена целина.
Нејзината уметност одамна го надмина локалниот контекст. Делата на Санторо биле изложени во повеќе европски земји, а неодамна и во Лос Анџелес, потврдувајќи дека дигиталниот колаж, во рацете на вистински креативец, нема граници. Таа има учествувано и во меѓународни резиденции, меѓу кои престојот во GLO’ART во Белгија, како дел од Arte Laguna Prize, каде создаде серија дела во кои жената се прикажува како симбол на моќ и нежност во исто време.
Со своите колажи, Кјара Санторо не само што го менува традиционалниот однос кон фотографијата и дигиталната уметност, туку отвора врата кон едно поинакво, поигриво и поетично доживување на светот околу нас – свет што понекогаш изгледа пореален во сонот отколку во јавето.
